ეროვნული ბანკი აგრძელებს 2020 წელს დანერგილ პრაქტიკას და ამჯერად ახალ, სამწლიან საზედამხედველო სტრატეგიის დოკუმენტზე მუშაობს, რომლის ფარგლებშიც 2026-2028 წლებისთვის ეროვნული ბანკის საზედამხედველო პრიორიტეტები და შესაბამისი აქტივობები განისაზღვრება.
საზედამხედველო სტრატეგიის დოკუმენტი უზრუნველყოფს ეროვნული ბანკის საზედამხედველო პრიორიტეტებსა და გეგმებზე სექტორისთვის, ინვესტორებისათვის, საერთაშორისო საფინანსო ინსტიტუტებისათვის, სარეიტინგო კომპანიებისთვის, მოსახლეობისა და სხვა დაინტერესებული მხარეებისთვის ინფორმაციის ხელმისაწვდომობას და ქმნის კიდევ უფრო გამჭვირვალე სამუშაო გარემოს.
საზედამხედველო პრიორიტეტების განსაზღვრისას, ეროვნული ბანკი ითვალისწინებს:
· საერთაშორისო პარტნიორებისგან მიღებულ რეკომენდაციებსა და ნაკისრ ვალდებულებებს;
· საუკეთესო საერთაშორისო პრაქტიკისა და ტენდენციების ანალიზს;
· საზოგადოებისა და სექტორისგან მიღებულ მოსაზრებებს;
· საზედამხედველო მანდატის ფარგლებში გამოვლენილ საჭიროებებს, არსებულ რისკებსა და გამოწვევებს.
ეროვნული ბანკი გაეცნო მიმდინარე საერთაშორისო ტენდენციებს და სხვა ქვეყნების კოლეგა უწყებების სამოქმედო გეგმებს, რომელთა გათვალისწინებით, მომდევნო საშუალოვადიან პერიოდში აქტუალური საკითხებს შორისაა გეოპოლიტიკური რისკების მართვა, როგორც საზედამხედველო ორგანოს, ისე საფინანსო სისტემის მონაწილეთა მხრიდან. ასევე, საოპერაციო და კიბერ რისკების მართვის, რეგულირებისა და ზედამხედველობის საკითხები. მიმდინარე ციფრული ტრანსფორმაციისა და დიჯიტალიზაციის პირობებში კი მნიშვნელოვან გამოწვევად რჩება ახალი ტექნოლოგიების, მათ შორის, ხელოვნური ინტელექტისა და მანქანური სწავლების და მათი გამოყენების თანმდევი რისკების შესწავლა და რეგულირება.
საზედამხედველო სტრატეგიის შემუშავების პროცესში, არსებითად მნიშვნელოვანია, გავიგოთ სექტორისა და დაინტერესებული პირების, საზოგადოების წევრების მოსაზრებები ეროვნული ბანკის სამომავლო საზედამხედველო პრიორიტეტების მიმართ არსებულ მოლოდინებსა და ზოგადად მიმდინარე გამოწვევებზე. შესაბამისად, გთხოვთ, გაგვიზიაროთ თქვენი მოსაზრებები ქვემოთ მოცემულ კითხვებზე (შესაძლებელია როგორც ყველა, ისე რომელიმე კონკრეტული კითხვის პასუხად თქვენი პოზიციის მოწოდება).
გთხოვთ გაითვალისწინოთ, რომ იგეგმება ეროვნული ბანკის 2026-2028 წლების საზედამხედველო სტრატეგია ეხებოდეს ეროვნული ბანკის მხოლოდ ზოგიერთ საზედამხედველო სუბიექტს, კერძოდ, კომერციულ ბანკს, მიკრობანკს, მიკროსაფინანსო ორგანიზაციას, საკრედიტო კავშირს, ვალუტის გადამცვლელ პუნქტს, სესხის გამცემ სუბიექტს, საკრედიტო საინფორმაციო ბიუროს, ფასიანი ქაღალდების დამოუკიდებელ რეგისტრატორს, საბროკერო კომპანიას (გარდა სადაზღვევო ბროკერისა), საფონდო ბირჟას, ცენტრალურ დეპოზიტარს, სპეციალიზებულ დეპოზიტარს, აქტივების მმართველ კომპანიას, ანგარიშვალდებულ საწარმოს, საინვესტიციო ფონდს, ავტორიზებულ სეკიურიტიზაციის სპეციალურ მიზნობრივ ერთეულს და საპენსიო ფონდს. აღნიშნული სუბიექტები ამ კითხვარის მიზნებისთვის ერთობლივად იწოდებიან როგორც საფინანსო სექტორი/საფინანსო სექტორის წარმომადგენლები. ეროვნული ბანკის ცალკეული საზედამხედველო მიმართულებების კუთხით, შესაბამის სუბიექტებსა თუ მიმართულებებზე მორგებული სტრატეგიები აღნიშნული სტრატეგიისგან დამოუკიდებლადაც მზადდება და ქვეყნდება ეროვნული ბანკის ვებგვერდზე.
მოსაზრებების დაფიქსირება შესაძლებელი იქნება 2026 წლის 23 იანვრის ჩათვლით. დამატებითი კითხვების შემთხვევაში, გთხოვთ, დაგვიკავშირდეთ ელ-ფოსტაზე - SupervisoryStrategy@nbg.gov.ge.