Ymgynghoriad ar Ardoll Ymwelwyr Arfaethedig yn Sir Conwy
Cyflwyniad
Mae Cyngor Bwrdeistref Sirol Conwy yn ceisio barn ynghylch a ddylid cyflwyno Ardoll Ymwelwyr yn y sir o dan ddarpariaethau Deddf Llety Ymwelwyr (Cofrestr ac Ardoll) etc. (Cymru) 2025.
Mae Ardoll Ymwelwyr yn dâl a godir ar arosiadau dros nos mewn llety i ymwelwyr (er enghraifft gwestai, tai llety, llety hunanddarpar, safleoedd gwersylla a llety tebyg. Mae Llywodraeth Cymru wedi gosod y cyfraddau ardoll cenedlaethol canlynol:
· £1.30 y person, y noson ar gyfer y rhan fwyaf o fathau o lety
· £0.75 y person, y noson ar gyfer hosteli a lleiniau pebyll
Os ydy darparwyr llety i ymwelwyr wedi cofrestru at ddibenion TAW, bydd TAW yn berthnasol i gyfanswm y gost a godir ar ymwelwyr, gan gynnwys unrhyw ardoll a drosglwyddir i’r ymwelydd.
Mae’r eithriadau canlynol ar waith:
· pobl o dan 18 oed sy’n aros ar lain wersylla neu mewn ystafelloedd a rennir (megis hostel neu ystafell gysgu)
· pobl sy’n aros am fwy na 31 noson mewn un archeb
· pobl mewn llety argyfwng neu lety dros dro a drefnir gan y Cyngor lleol
Ar hyn o bryd, nid oes unrhyw benderfyniad wedi’i wneud i gyflwyno Ardoll Ymwelwyr yng Nghonwy, a bydd ymatebion i’r ymgynghoriad yn cael eu hystyried cyn gwneud penderfyniad.
Bwriad yr ymgynghoriad hwn yw:
· casglu barn ynghylch a ddylid cyflwyno ardoll; a
· deall safbwyntiau ar sut y gallai weithredu’n lleol; a
· llywio unrhyw benderfyniad yn y dyfodol gan aelodau etholedig.
Beth fyddai ardoll yn ei olygu?
· Byddai’r ardoll yn berthnasol i ymwelwyr sy’n aros dros nos mewn llety â thâl.
· Byddai’n cael ei chasglu gan ddarparwyr llety.
· Byddai unrhyw incwm a godir yn cael ei gadw yn Sir Conwy ac yn cael ei ddefnyddio i gefnogi gwasanaethau ac isadeiledd sy’n ymwneud ag ymwelwyr a chymunedau.
· Byddai Fforwm Partneriaeth Ardoll yn cynghori ar sut y dylid gwario incwm yr ardoll.
Sut y gellid defnyddio’r arian?
· Cynnal a gwella mannau cyhoeddus
· Cefnogi isadeiledd twristiaeth a chyfleusterau ymwelwyr
· Gwella cludiant a mynediad
· Cefnogi asedau treftadaeth, diwylliant a chymunedol
· Rheoli effeithiau amgylcheddol
Enghreifftiau yn unig yw’r rhain. Nid oes penderfyniadau wedi’u gwneud ynghylch sut y byddai cyllid yn cael ei ddyrannu.
Sut i ddefnyddio’r ffurflen hon
Atebwch gynifer o gwestiynau â phosibl. Nid oes rhaid i chi ateb pob cwestiwn.
Dewiswch o’r canlynol pa gategori budd-ddeiliad sy’n berthnasol i chi. Bydd hyn yn helpu i deilwra’r arolwg i’r cwestiynau mwyaf perthnasol.
Datganiad Preifatrwydd
Bydd unrhyw wybodaeth bersonol a gyflwynir yn cael ei defnyddio at ddibenion dadansoddi’r arolwg yn unig. Bydd yn cael ei rhannu â chwmni allanol ar gyfer dadansoddi. Bydd unrhyw adroddiadau cyhoeddus yn ddienw. Bydd data personol yn cael ei gadw am 5 mlynedd.
Ymwadiad
Mae’r ymgynghoriad hwn yn casglu gwybodaeth am gyfeiriad IP er mwyn atal ymatebion dyblyg neu awtomatig. Defnyddir y wybodaeth hon i ddiogelu cywirdeb canlyniadau’r ymgynghoriad yn unig ac ni chaiff ei defnyddio i adnabod ymatebwyr yn bersonol. Caiff yr holl ddata ei brosesu’n ddiogel ac yn unol â chyfreithiau diogelu data perthnasol.